Мұқан Төлебаев атындағы музыка мектебіне қолдау

«Сәби» Қорының көп жылдар бенефициар мекемелерінің бірі – Алматы қаласындағы №5 балалар музыка мектебі болып табылады. Кезінде бұл оқу орнына күрделі жөндеуден бастап, студенттерге музыкалық аспаптар сатып алуға дейін түрлі қолдау көрсеттік.

Жақында біздің қор мектеп атымен аталған көрнекті композитор, дирижер және ұстаз Мұқан Төлебайұлы Төлебаевтың 110 жылдығына арналған мерекелік концертті ұйымдастыруды және өткізуді қаржыландырды.

Абай атындағы Қазақ ұлттық опера және балет театрының сахнасында көрермендерге «Мұқан Төлебаев» музыкалық әңгімесі ұсынылды. Бұл – композитордың тағдыры, балалық шағы, жастық шағы, толысқан шағы, шығармашылық жолы туралы. Әңгіме соңында қазақ музыка өнерінің інжу-маржаны – оның әйгілі «Біржан мен Сара» операсынан үзінді орындалды. Концерттің авторы және режиссері «Құрмет» орденінің кавалері, Ы.Алтынсарин атындағы медальдің иегері, мектептің көркемдік жетекшісі Чалдаева Шамиля Хасянқызы.

Мұндай жобалар Қазақстанның музыкалық мұрасының сұлулығы мен құндылығын сақтап, өскелең ұрпаққа жеткізуге көмектесетініне сенімдіміз.