«Сәби» қоры L’aroush jewelry зергерлік үйімен қайырымдылық серіктестігін жалғастыруда. Бағдарлама аясында «Амулет» коллекциясындағы бұйымдардың сатылымынан түскен кірістің 5%-ы Қазақстандағы медициналық және әлеуметтік мекемелерді қолдауға бағытталады.
Бүгінгі таңда жиналған қаражаттың арқасында еліміздің екі мекемесіне балаларды емдеу және оңалтуға арналған арнайы жабдықтарды сатып алу мүмкін болды. Атырау облыстық балалар ауруханасына 20 хирургиялық аспиратор, 19 пульсоксиметр, 15 компрессорлық ингалятор, 11 мүгедектер арбасы, 5 медициналық арба, 3 автоматты тонометр және 2 дем шығару жылдамдығы индикаторы сатып алынып, табысталды.
Бұл жабдықтар дәрігерлерге кішкентай науқастардың жағдайын жедел әрі дәл бақылауға, медициналық процедураларды тиімді жүргізуге және шұғыл көмек көрсетуге мүмкіндік береді. Аспираторлар, ингаляторлар және дем шығару жылдамдығы индикаторлары тыныс алу жолдары аурулары бар балалар үшін ерекше маңызды. Пульсоксиметрлер қандағы оттегі деңгейін жедел бақылауға көмектессе, мүгедектер арбалары операциядан кейінгі балалардың қозғалуына қолайлы жағдай жасап, олардың жайлылығын қамтамасыз етеді.
Екінші бенефициар жүйке жүйесі мен тыныс алу органдарының созылмалы аурулары бар балаларға арналған Алматы қаласындағы «Балдәурен» балаларды оңалту орталығы болды. Мекемеге 2 дарсонвализация және ультратоналды терапия аппараты, сондай-ақ 2 магнитотерапия аппараты сатып алынып, табысталды.
Физиотерапиялық жабдықтар жарақаттардан, операциялардан және неврологиялық аурулардан кейін қалпына келу үдерісінде маңызды рөл атқарады. Дарсонвализация мен магнитотерапия қан айналымын жақсартуға, қабыну үдерістерін азайтуға, тіндердің қалпына келуін жеделдетуге және баланың ағзасын жалпы нығайтуға ықпал етеді.
Осылайша, акция аясында зергерлік бұйымдарды сатып алған әрбір сатып алушы балалардың денсаулығына өз үлесін қосты. Біз L’aroush зергерлік үйіне және бастаманы қолдаған барлық сатып алушыларға алғысымызды білдіреміз – бірге біз жүйелі өзгерістер жасап, медициналық көмекті ерекше мұқтаж адамдар үшін қолжетімді етеміз.