Мәулен Ахметов Назарбаев Университетінің бірінші курсында оқып жүрген шағында әлеуметтік кафе ашу идеясын алғаш рет ойға алды. Ол уақытта бұл бастама тым алыс, жүзеге асуы екіталай арман болып көрінген еді. Ол менталдық ерекшелігі бар адамдардың өздерін қоғамның ажырамас бөлшегі ретінде сезініп — еңбек етіп, дамып, өз қажеттілігін ұғынатын кеңістік құруды армандады. Алайда ол кезде бұл идеяға шын сеніммен қарағандар өте аз болды. Бірақ сол санаулы жанашырлардың қатарында «Сәби» қоры да бар еді.
«Өз бизнесіңді баста» байқауы аясында қорымыз Мәуленге қаржылай демеу ғана емес, ең бастысы – сенім мен рухани қолдау көрсетті. Бұл оның идеясына жан бітіріп, алға жылжуына жол ашқан шешуші кезең еді.
Осыдан сегіз жыл бұрын, бар болғаны университет аумағындағы шағын ғана кафе — бүгінде Kunde деп аталатын, көптеген нейроерекше жанды жұмыспен қамтып отырған, тұрақты дамып келе жатқан, еліміздің түкпір-түкпіріндегі әлеуметтік кәсіпкерлерге шабыт беретін, қуатты әрі өміршең бизнеске айналды.
Жуырда қор президенті Асель Иманғалиқызы мен Мәуленнің жүрекке жылу сыйлаған кездесуі өтті. Бұл жолы ол байқауға қатысушы ретінде емес, талай тағдырға оң өзгеріс әкелген, өз ісінің берік іргетасын қалаған әлеуметтік кәсіпкер ретінде жүздесті. Уақыт өте келе Мәулен сол алғашқы қолдаудың қаншалықты құнды болғанын ерекше алғыспен еске алды — басқалар әлі сенімсіздікпен қараған сәтте, оған алғаш болып сенім артқан да, үміт сыйлаған да дәл осы «Сәби» қоры болғанын атап өтті.
Бұл шынайы сұхбатта сенім, табандылық және әлеуметтік бастамалардың терең мәні туралы сыр шертілді.
Мәуленмен болған әсерлі әңгімені назарларыңызға ұсынамыз.